| تبليغات | X |
اوشاقلار بيزيم گوزوموزون ايشيغي و اوره گيميزين پارچاسي دير گلين بوگوزل بالالاريميزي سئوك ، عزيز ساياق و اينجيتمه يك
من سیزه تاپیشیریرام آشاغیداکی شکیلی بویودوپ باخمایاسیز، نه اولور نه اولماز بیر دن گورورسونوز ........ من دئمیش اولوم کسیری سیزه قالمیش .
دئمه دیم می ؟ يوخ كي اگر چوخ سئومیش ایسه نیز منه یازین باشقا شکیل لر ده بورا دا گوستریلسین.
كوكوموزدن آيري دوشدوك
سن بير بوداق من بير بوداق
بالتاچي نين قصدي اودور
ريشه ميزي بيز اونوداق
آدام اوتوروب دوراندا ، دئيير : يازيب پوزماق و بئينينده كي دوشونجه لريني باشقا لارينا يازاراق آنلاتماق چوخ راحات بير شئي دير ؟! امما يو...... هئچ ده ائله دوشوندويوموز تكين دئيل ، بيز لر اوچ دورت سطيري بير يئره يغماق دان اوتورو ، نه قدر دوشونور ـ داشينير ، سوز لري اويان بويان ائليير ، گينه ده بير آغيللي باشلي بير يازييا اوخشادا بيلميريك .
دئيه جاغيم او كي ، بيزيم بو د يرلي شاعير و يازارلاريميز، نه قدر گوجلو و قوتلي فيكير و قلمه صاحيب دير لر كي ، ياراتديقلاري اثر لري ياغ تكين آخير و اوخويانلارين يورگينه اوتورور . هله بو شاعير گنج ايسه دوغرودان دا آدام بو قدرته مات قالير .
بو شعري گنج دوستوم صالح سجادي دان اوخويون ..
اللرینه دونوم سازی دیللندیر
ائله چال سیملردن ایلدیریم شاخسین
چاتداییب سهندین دیلی دوداغی
دئه بولودلار یاغسین دئه چایلار آخسین
کونلومی تالاییب غم یوگورتوسی
جنگی کوراوغلونی سسلیه نیم یوخ
بوغولموش سینه مده قالانیب دردلر
سازین سینه سینه بسلیه نیم یوخ
سنسن یور گیمین خسته قاسیمی
یورولموش سازینی اللرینه آل
چالینیب چالینیب اللرین آلتدا
سیملری قابارمیش سازی بیرده چال
(قارا باغ) هاواسین ائله سیندیر کی
سازیندا بیر سوری(قیرآت) کیشنه سین
آتلارا بیر قوشون (کور اوغلو)میندیر
دمیر لر چئینه سین زنجیر دیشله سین
باشین آغارسادا قوجالمامیسان
ساوالان داغیسان قاردی باشیندا
سازیلان سوزیلن اکیزتاییسان
اوزونده جاوانسان قارینتاشیندا
چوخداندیر سازینین سیزیلتی سننا
شهریمین داغلاری تامارزی قالیب
یابانجی موسیقی یابانجی شعیر
ائلیمین قولاقین گوزلرین آلیب
(بتهوون)دئیر سوز قورتولان یئردن
موسیقی باشلانیب ال آیاق آچار
من بئله بیلیرم سنین موسیقین
موسیقی قورتولان یئردن باشلانار
بوچوخ سئودییم اثری چوخ دیرلی شاعیریمیز، « محمد حسین طهماسب پور شهرک » جنابلارینین « باهاریم گل » کیتابیندان آلیب سیزلره یازیرام .
یولداش ! سنله یولداش اولاندان بری
بیر لحظه یولداشسیز قالا بیلمیرم .
سنسیز ایتیریرم اوز اوزلویومو،
ساغا گیجه لیرم ، سولا ، بیلمیرم .
گزیرم آرانی ، گزیرم داغی ،
گزیرم باغ آرابیر- بیر بوداغی ،
هر گون آختاریرام بوستانی ، تاغی
عطرینی هئچ گولدن آلا بیلمیرم .
سن نه سن ؟ ائلیمین گوزوسن دئییم ؟
دیلی سن ، آغزی سان ، سوزوسن دئییم ؟
ائلیمین گورکمی ، اوزو سن دئییم ؟
سنسیز ائلی یا دا سالا بیلمیرم .
کیمه بئل باغلادیم ، بئلیمدن ووردو ،
شیرین دیل سویله دیم ، دیلیمدن ووردو ،
سیخدیم اللرینی ، الیمدن ووردو ،
یاد الین الیمه آلا بیلمیرم .
هاردا سان الیمه گل وئر الینی
آچیق آنلین اوپوم دوتوم قولونی
انتقاد ائتد یین آجی دیلینی
اوخشادیم شکره ، بالا بیلمیرم
« میرزه » یم گولله نرسنینله یازیم ،
سنسیز اوجالانماز نغمه م ، آوازیم ،
« ساری تئل » اوستونده کوکله نیب سازیم
نئیله ییم ، سن یوخسان چالا بیلمیرم .
1365
بو وئبلاگین آچیلماسیندا چوخ عزیز دوستوم " امیر " ( قره امیر ) ین زحمت لریندن تشکر ائتمه یی اوزومه بورج بیلیرم .